Tatar Ukur

Samemeh Kabupaten Bandung ngadeg, daerah Bandung katelah meunang pangjuluk “Tatar Ukur”. Anapon anu ka ereh daerah Tatar Ukur,nurutkeun naskah Sadjarah Bandung, nyaeta puseur dayeuhna di Karapyak. Wilayahna ngawengku daerah Timbanganten,Gandasoli, Adiarsa, Cabangbungin, Banjaran, Cipeujeuh, Majalaya, Cisondari, Rongga, Kopo, Ujungberung, jeung daerah sejena.


 Timimiti abad ka 15, sacara turun tumurun karajaan Timbanganten anu puseur dayeuhna di Tegalluar diparentah ku Prabu Pandaan Ukur,Dipati Agung, katut Dipati Ukur. Wilayah Tatar Ukur teh kawilang lega ambahanana ngawengku 9 daerah anu aya di Jawa Barat tur meunang sebutan “ukur sasanga.”


 Sabada karajaan Pajajaran burak taun 1579 alatan di rurug ku wadia balad Banten anu hayang nyebarkeun agama Islam di Jawa Barat, (samemehna) raja Pajajaran anu katelah Prabu Siliwangi ngutus opat urang kandang lante pikeun masrahkeun Mahkota Siger Binokasih ka Nalendra Sumedanglarang. Utusan anu opatan teh nyaeta Jaya Perkosa, Nangganan, Kondanghapa, jeung Pancar Buana.
 Ari anu jeneng nalendra di Sumedanglarang mangsa harita nyaeta Putra Ratu Poetjoek Oemoen,pangeran Angkawijaya alias Prabu Geusan Ulun. Atuh nalika opat urang kandanglante Pajajaran masrahkeun makuta minangka simbul kakawasaan Pajajaran, ku Nalendra Sumedanglarang dibageakeun kalawan daria. Nurutkeun panca kaki mah antara Sumedanglarang jeung Pajajaran teh, cenah, sakaruhun.


 Tisaprak burakna karajaan Pajajaran, ahirna Tatar Ukur oge jadi bagian tina wilayah kakawasaan karajaan Sumedanglarang (panerus karajaan Pajajaran). Puseur dayeuh karajaan Sumedanglarang teh di Kutamaya (kuloneun kota Sumedang ayeuna).

Nalika karajaan Sumedanglarang diparentah ku Raden Aria Suriadiwangsa (anak tere Raden Angkawijaya ti Ratu Harisbaya),Sumedanglarang jadi daerah kakawasaan Mataram (1620). Tiharita status Sumedanglarang robah tina karajaan jadi kabupaten (Kabupaten Sumedang). Ku Mataram wilayah priangan dijadikeun daerah pertahanan Mataram bagian barat. Nyaeta pikeun nyegah ayana kamungkinan serangan pasukan Banten atawa soldadu kompeni anu ngamarkas di Batavia (Jakarta).

Kasultanan Mataram dibawah kapamingpinan Sultan Agung (1613-1645) terus-
terusan patelak jeung pihak kompeni, pon kitu keneh deuih kasultanan Mataram jeung kasultanan Banten teu weleh getreng mumusuhan.
 Pikeun ngalingling, ngaping ngajaring, wilayah priangan, Sultan Agung Mataram ngistrenan Raden Aria Suradiwangsa jadi bupati wadana (pingpinan para bupati) di Priangan (1620-1624) kalayan gelar Pangeran Rangga Gempol Kusumadinata, kakoncara ku julukan Pangeran Rangga Gempol I. Taun 1624 Sultan Agung mere tugas ka Rangga Gempol I sangkan ngarurug nalukeun daerah Sampang (madura). Sawatara Rangga Gempol I ngajalankeun pancen ngarurug Sampang, jabatan bupati wadana Priangan diwakilkeun ka adina Rangga Gempol I nyaeta Pangeran Dipati Rangga Gede. Kasempetan ieu dimangfaatkeun ku pasukan Banten pikeun ngarurug Sumedang, meungpeung Rangga Gempol I katut sajumlah pasukanana aya di Sampang. Tumerapna, Pangeran Rangga Gede kateter nyanghareupan pasukan Banten, sabab wadia balad pasukanana sabagian milu tugas jeung Rangga Gempol I.


 Lantaran teu mampuh ngayonan musuh, pangeran Dipati Rangga Gede meunang sangsi hukuman ti Sultan Agung. Inyana di tahan di Mataram. Salila pangeran Dipati Rangga Gede di tahan di Mataram, jabatan Bupati Wadana Priangan dipasrahkeun ka Dipati Ukur, kalayan sarat Dipati Ukur kudu bisa ngarebut Batavia tina kakawasaan kompeni.


 Taun 1628 Sultan Agung nugaskeun Dipati Ukur pikeun ngabantu pasukan Mataram nyerang kompeni ka Batavia. Kalayan dibantu sekitar 10 rebu prajurit ti tanah Pasundan, Dipati Ukur transit di Karawang nunggu gabung jeung pasukan Mataram di bawah pingpinan Tumenggung Bahureksa. Kurang leuwih saminggu lilana pasukan Dipati Ukur nunggu pasukan Mataram. Tapi pasukan Mataram can rek embol-embol datang, antukna Dipati Ukur nyokot putusan seja nyerang pasukan kompeni di Batavia tanpa nunggu heula pasukan Mataram. Orokaya, pasukan Dipati Ukur kadeseh anu satuluyna kabur katawuran teu manggapulia ngayonan samagrengna pakarang pasukan kompeni.
 Demi serangan kadua, anu dilakukeun ku pasukan Tumenggung Bahureksa angger teu ngabuahkeun hasil. Pasukan Tumenggung Bahureksa jicir kocar kacir. Balukarna sang Tumenggung ngarasa keuheul ka Dipati Ukur anu geus ngalejokeun, teu sabar nungguan. Satuluyna Tumenggung Bahureksa ngalaporkeun eta perkara ka Sultan Agung supaya Dipati Ukur dicangkalakditibanan hukuman anu satimpal jeung kabedegonganana (bongan teu sabar nungguan).


Sadar kana eta kajadian, Dipati Ukur milih barontak. Inyana boga niat makar ku jalan misahkeun diri tina kakawasaan Sultan Agung Mataram. Dipati Ukur ngajak para umbul (pingpinan-pingpinan Sunda) pikeun biluk kamanehna nyieun kakuatan anyar, nyieun benteng pertahanan di Gunung Lumbung. Hanjakalna para umbul taya nu daek biluk di ajak barontak ka Sultan Agung ku Dipati Ukur. Samalah para umbul teh anu diantarana Ngabehi Wirawangsa (Sukakerta), Ngabehi Samanhita, Ngabehi Astra Manggala ( Sindangkasih), Uyang Sarana (Indihiang), kalah ngalaporkeun tindakan Dipati Ukur ka Sultan Agung.


 Sabada meunang laporan ti umbul anu opat, Sultan Agung langsung ngirim pasukan
tempur anu dipingpin ku Narapaksa pikeun ngagempur pasukan Dipati Ukur anu ngamarkas di Gunung Lumbung. Antukna eta dua pasukan der patelak. Mireungeuh aya kajadian bitotama antara pasukan Mataram ngalawan pasukan Dipati Ukur, sabagian warga sipil ngarungsi aya anu kebat ka daerah Banten, aya anu ka Batavia alias Jakarta. Dina eta bitotama pasukan Dipati Ukur unggul.


 Kuayana pasukan Mataran kasoran nyanghareupan pasukan Dipati Ukur, harita Sultan Agung muter otak, inyana inget sabab kungsi manggih beja yen pasukan Dipati Ukur ngan bisa dielehkeun iwalti ku pasukan wadia balad anu asalna ti tanah priangan. Satuluyna harita Sultan Agung menta bantuan Bagus Sutaputra ti karajaan Galuh. Alhasil dina serangan anu kadua pasukan Dipati Ukur bisa dielehkeun. Dipati Ukur beunang kacerek sarta meunang hukuman ti pihak Mataram.


 Sabada Dipati Ukur serah bongkokan ka Mataram, wilayah Tatar Ukur dipasrahkeun ka tilu umbul (pamingpin Sunda) anu henteu milu barontak ka Mataram. Eta tilu umbul teh nyaeta; Ngabehi Astamanggala alias Tumenggung Wiraangunangun,Ngabehi Samanhita alias Tumenggung Tanubaya, katut Ngabehi Wirawangsa alias Tumenggung Wiradadaha. Eta tilu ngabehi teh satuluyna dibenum jadi bupati mangrupa hadiah ti Sultan Agung sabab geus bisa ngelehkeun Dipati Ukur. Tumenggung Wiraangunangun jadi Bupati Bandung, Tumenggung Tanubaya jadi Bupati Parakanmuncang, Tumenggung Wiradadaha jadi Bupati Sukapura (ayeuna robah ngaran jadi Tasikmalaya).


 Nurutkeun sejen riwayat, cenah, hukuman anu ditibankeun ku Sultan Agung ka Dipati Ukur teh kawilang keji. Beuheungna di pangkek, awakna dimutilasi, dibeuleum sarta di picis. Taya nu apal persis dimana jasad Dipati Ukur di kubur. Nu tetela makam atawa kuburan Dipati Ukur meh aya di saban daerah, aya di sababaraha tempat saperti di Astana Luhur (Pemeungpeuk), Puncak Gunung Geulis (Ciparay), sisi Citarum (Desa Manggahang), Gunung Sadu (Soreang), Kampung Cikatul Pabuntelan (Pacet), Astana Handap (Banjaran), Gunung Tikukur (Desa Manggahang), oge di Pasir Luhur (Ujungberung Kaler).Ngeunaan riwayat Dipati Ukur memang aya sababaraha versi.***
     (Lili Guntur,diropea tina sawatara sumber),