Carpon : Salah Lengkah

SALAH LENGKAH
Carpon Lili Guntur

"KATINGALINA teh ilaing jiga anu kurang gairah kitu, kunaon Uneh, aya masalah"
"Puguh rungsing Uneh teh, loba kahayang."
"Ngarana oge jelema hirup, wajar loba kahayang, hartina ilaing teh masih normal. Cing hok, hayang naon ilaing teh? "
"Hayang loba duit Abah! Ameh hirup senang, teu genah geuning hirup jadi jelema miskin teh, batur oge teu ngajenan. Antukna loba meunag kanyerian, asa disapelekeun ku batur. "
"Cek Abah oge salaku jalma hirup wajar boga kahayang jeung cita-cita.  Ngan poma Abah peupeujeuh, dina enggoning ngahontal kahayang jeung cita-cita nalika ngalakonan ikhtiar geusan ngawujudkeun eta kahayang ulah nepika salah lengkah. "
"Salah lenglah kumaha? "
"Kieu geura Uneh, sakumaha nurutkeum beja ti Mang Warta, di daerah pakidulan aya hiji awewe usahana teh kana dagang, boga jongko di pasar. "
"Terus kumaha? "
"Eta jelema teh ngarasa peurih dumeh jongkona kurang rame daganganana jarang nu meuli.  Hiji mangsa manehna di bere bongbolongan ku babaturanana, pokna teh mun hayang payu dagang kudu daek ikhtiar nyiar samara. Ngarti silaing maksudna? "
"Ngarti, Abah.Nyiar asihan penglaris. "
"Tah heueuh, aji kinasihan pikeun payu dagang. Caturkeun eta awewe teh indit di anteur ku salakina nepungan anu bisa, nyaeta orang pinter panuduhan babaturana tea. Caturkeun barang nepi kanu di tuju kabeneran jalma anu sok biasa di pake pananyaan teh keur aya di imahna.  Imah panggung sisi lembur paragi praktek eta dukun ngubaran pasen. Sanggeus paduhareupan jeung eta dukun kalayan kasaksian ku salakina,  eta awewe teh balaka yen usahana keur sepi, dagang teu payu, jongko kurang pembeli."
"Wah, Bah, Uneh geus bisa nebak kumaha endingna ieu carita. "
"Mengke heula cicing  montong nyanyahoanan motong kalimah. Memang jalan carita pasti bisa ka tebak, tapi lebah endingna Uneh, pesan moral... pesan moral... tah eta nu paling penting. "
"Ya siap Bah, sok atuh tuluykeun deui kumaha cenah satuluyna lalakon eta awewe teh? "
"Tah, cek eta dukun, pangna usaha teu maju teh, dagang teu weleh tiiseun, sabab dina awak eta awewe aya rereged anu baris jadi panghalang kana kalancaran usahana."
"Hem..."
"Geus kitu eta dukun teh nyarita ka salakina,menta persetujuan yen rereged anu ngancik dina jero awak pamajikanana kudu di laan. Diberesihan tur dikaluarkeun ku cara di rukiyah. Saratna si pasen kudu nyadiakeun mahar mangrupa duit anu lobana luyu jeung naktu lahir. "
"Kumaha maksudna naktu lahir teh? "
"Heu pan dina istilah huwa howe mah, kitu cek almarhum lebe Amin oge, istilah-istilah nu kitu teh sok dipake.  Ari sanaktu teh nyaeta luyu jeung lobana itungan poe.  Contona lamun wedal atawa hari lahirna Saptu, nurutkeun huwa howe atawa paririmbon, naktu poe Saptu teh salapan. Jadi sarat mahar anu kudu disadiakeun teh gedena naha bisa salapan ratus perak, salapan rebu perak,salapan puluh rebu perak, atawa salapan ratus rebu perak, atawa salapan juta perak... "
"Genah atuh nya kitu mah dukun teh loba duit ladang mahar."
"Heueuh deuleu Uneh, matak sok aya kecap paribasa dukun lintuh panyakit matuh, hik hik hik... "
"Bet seuri Abah? "
"Hayang we Suneh, nyeungseurikeun profesi dukun. "
"Terus kumaha tuluyanana? "
"Hehehe, silaing panasaran nya? Tah kitu ngeunaan masalah naktu teh.  Kabeneran wedal eta awewe teh Saptu, jadi naktuna salapan.  Si dukun nanya kasanggupan ka salakina, naha rek nyokot nu mana gedena mahar teh, rek salapan ratus perak, rek salapan rebu perak,  atawa... "
"Nyokot nu sabaraha Bah, eta salakina teh?"

"Harita inyana milih nyokot nu salapan ratus rebu, pokna ameh gancang sukses di ijabah.  Tah geus sidik di idinan kunu jadi salakina, si dukun teh asup ka kamar praktekna dibaturan ku si pasen. Sawatara salakina titah nungguan di ruang tamu, nunggu pamajikanana di terapi ku si dukun pikeun dikaluarkeun kokotor batin anu jadi rereged kana kalancaran usaha jeung kahirupanana."

"Ah..., obrolan kieu mah pasti kadituna cabul. "
"Indo indo si Uneh baku geus motong caritaan teh. Perhatikeun mah deuleu ke kumaha endingna. "
"Geus ka baca ku Uneh oge. Geura sok ku Abah tuluykeun.. "
"Tah Suneh, si dukun teh nyarita ka pasen, manehna menta ijin rek nyedot rereged anu cicing dina tujuh titik awak si pasen."
"Tuh nya, cek Uneh oge,mimiti modus.Moal salah tujuh titik eta pasti... "
"Lebah tarang, ceuli, panon, irung, biwir, pinareup jeung... "
"Tuh kan... dasar dukun cabul "
"Tah terapina ku cara kitu Suneh, di seuseup tina tujuh titik."
"Boa leuwih ti kitu."
"Dina pertemuan kahiji ku cara kitu."
"Apaleun salakina?"
"Henteu. Sabab si dukun wanti-wanti ka si pasen, kudu bisa neundeun rahasia ngeunaan cara-cara terapi anu dilakukeun ku manehna."
"Tapi Uneh yakin Bah,  kalakuan si dukun hiji waktu bakal ka tohyan."
"Memang eta oge ahirna mah kalakuan dukun cabul teh katohyan. Sabada tujuh kali pertemuan salakina curiga.  Sabab lamun eta dukun keur ngalaksanakeun terapi kapamajikanana di rohangan praktek, rata-rata tara kurang ti satengah jam lilana teh. Sakali mangsa mah bakat ku ngarasa curiga jeung kesel nungguan,  antukna panto kamar praktek teh di dobrak. Ana breh teh kasampak si dukun keur nekeman pamajikanana. Sarta katingali pakean pamajikanana ngalumuk handapeun dipan."
"Teu uyahan, geus pasti kitu ending caritana teh."

"Tak tage Suneh, kade wanti-wanti, dina ihtiar ngudag kahayang jeung cita-cita poma ulah salah lengkah. Pituduh keur nu ngaku islam mah geus pertela dina alquran.  Buka geura surat Ali Imron ayat 145 ,Alloh ngadawuh : 'Lamun anjeun boga kahayang jeung cita-cita mangka tawekal ka Kami,' kitu pidawuh Gusti atra pertela."
"Ari tawekal teh kumaha tea Bah?"
"Hartina tawekal teh sumerah diri. Pasrah bari ngajalankeun tarekah.  Cek para ahli anu wijaksana,  konci sukses dina kahirupan teh paling copel aya  lima perkara: Kahiji sehat,  kacida pentingna urang miara awak sangkan sehat. Sabab kuayana awak sehat urang bisa laluasa bergerak,  beraktifitas ngagarap pagawean.  Kaduana silaturahmi, gaul, anjangsono. Kuayana silaturahmi bakal loba sobat jeung baraya. Ngan poma ulah gaul sembarang gaul bisi kabawa pergaulan teu puguh. Katiluna konci sukses teh nyaeta fokus,satia kana profesi, teu ceehan mancla-mencle,ngarancabang gawe.  Kaopatna soson-soson alias kerja keras,ulah weweling."
"Naon weweling teh Bah?"
"Mumungkaleun.  Mangsana daek, uuuh getol kacida,  ana mangsana males, mumul we tara daek maksakeun."
"Hemm.. hiji deui Bah, kalima... "
"Tah kitu Uneh,  mun bisa mah dina ngagarap profesi teh kudu istiqomah, ajeg, panceg, kontinyu, tuluy-tuluy. Anu kalima konci sukses dina ngahontal hirup jeung huripna teu leupas tina ayana du'a.  Urang kudu rajin ngadu'a nyinekelkeun naon rupa pasualan hirup mung ka Alloh. Alloohush shomad, Alloh teh tempat paneumleuhan sagala rupa pasualan."
"Teuing... sok aneh ku si Abah teh."
"Aneh lebah mana na Suneh?"
"Lamun nyarita sok kawas anu enya. Pareng nyarita soal agama meni norolang siga ustad, pareng nyarita soal politik ih meni capetang kawas anggota parlemen. Sunggug luar biasa Abah mah.  Pareng mangsana pikasedileun tara kagok..."
"Lebah mana Abah pikasedileunana?"
"Lebah purunyusna, lamun geus ngajak salingkuh."
"Ulah sok kitu Uneh,ijid bibirigidigan sedil ka Abah, bisi di pelet keh ku Abah."
"Moal deuk ka pelet ku Abah, Abah mah lain lalaki tipe Uneh."
"Tipe lalaki nu kumaha kitu cowok idaman silaing? "
"Nu kasep, jeung teu madesu."
"Naon ieuh madesu teh?"
"Masa depan suram."
"Ulu ulu... si Uneh luar biasa selerana. Di ajak kawin dijadikeun nu ngora embung."
"Teu kaharti Bah.  Anggur sing Uneh teh do'akeun sing geura meunang jodo anu sesuai jeung kahayang Uneh."
"Kahayang Abah mah memeh Uneh meunang jodo,Abah hayang laksana heula ka untun tipung katambang beas, laksana kapiduriat."
"Abah teh serius hayang ka Uneh?"
"Heueuh Suneh,  tibaheula oge Abah mah serius."
"Terus terang emang Abah teh ganteng sok sanajan geus kolot oge, tapi pedit tara ngajajanan."
"Indo indo.... si Uneh kaniaya.  Hayu ku Abah di traktir."
"Abah ngajak kamana? Ka rumah makan rek nraktir Uneh?"
"Heueuh. Urang jalan-jalan, jajan bala-bala."
"Ih, teu uyahan dasar medit, sugan teh ngajak jalan-jalan ka mol. Tapi teu nanaon ketang lumayan keur lapar kieu mah, jajan bala-bala oge. Hihihi... yu,Bah!"***